កីឡាការិនី២រូបបង្ហាញចំណាប់អារម្មណ៍ក្រោយចាក់វ៉ាក់សាំងដូសទី៣

2021-08-23 19:32:59
កីឡាផ្សេងៗ

2021-08-23 19:32:59
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាការិនីឆ្នើមជម្រើសជាតិកម្ពុជា ២រូបរួមមាន ប៉ាល់ ឆរស្មី និង ថន សុម៉ាវត្តី ថាការចាក់វ៉ាក់សាំងដូសទី៣ នេះមានសារសំខាន់ ធ្វើឲ្យខ្លួនរឹតតែមានទំនុកចិត្តក្នុងការហ្វឹកហាត់ និងអរគុណចំពោះការគិតគូរពីសមត្ថភាពប្រជាពលរដ្ឋ។

រូបភាពហ្វេសបុក ប៉ាល់ ឆរស្មី

កីឡាការិនី ប៉ាល់ ឆរស្មី មកពីសហព័ន្ធកីឡាវ៉ូវីណាម លើកឡើងថា ការចាក់វ៉ាក់សាំងដូសទី៣ នេះគឺពិតជាមានសារសំខាន់ចំពោះពួកគេ ព្រោះឲ្យច្បាស់ថាម្នាក់ៗមានប្រព័ន្ធភាពសាំងក្នុងការប្រឆាំងជំងឺកូវីដ។ មួយវិញទៀតគឺធ្វើឲ្យក្រុមកីឡាកីឡាជម្រើសជាតិមានឱកាសប្រមូលផ្ដុំហ្វឹកហាត់ឡើងវិញបានបន្ទាប់ពីចាក់វ៉ាក់សាំងដូសទី៣ រួចហើយដើម្បីត្រៀមការប្រកួតនានា។

រូបភាព CAMSOC

ចំណែកកីឡាការិនី ថន សុម៉ាវត្តិ មកពីសហព័ន្ធកីឡាទ្រីយ៉ាត្លុងវិញលើកឡើងស្រដៀងគ្នានេះដែរថា ការបានចាក់វ៉ាក់សាំងដូសទី៣ នេះរឹតតែធ្វើឲ្យរូបគេមានភាពកក់ក្ដៅក្នុងការហ្វឹកហាត់ និងមិនសូវប្រឈមចំពោះការចេញក្រៅដូចជាការប្រកួតផ្សេងៗ ប៉ុន្តែរូបគេនៅតែបន្តប្រុងប្រយ័ត្នថែរក្សាអនាម័យ។ ប៉ាល់ ឆរស្មី និង សុម៉ាវត្តី ថ្លែងអំណរគុណដល់ប្រមុខរាជរដ្ឋាភិបាល ក្រសួងអប់រំ យុវជន និងកីឡា គណៈកម្មការជាតិអូឡាំពិកកម្ពុជា (NOCC) ដែលបានយកចិត្តទុកដាក់ចំពោះប្រជាពលរដ្ឋជាពិសេសក្រុមកីឡាជម្រើសជាតិដែលត្រូវហ្វឹកហាត់ត្រៀមការប្រកួតធំៗតំណាងប្រទេសនៅពេលខាងមុខ។

រូបភាព CAMSOC

រំលឹកដែរថា ម្សិលមិញនេះគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) ក្រោមកិច្ចសហការជាមួយក្រុមការងារវ៉ាក់សាំង នៃក្រសួងការពារជាតិ បានបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ប្រភេទ AstraZeneca ដូសជំរុញ ឬដូសទី៣ ជូនថ្នាក់ដឹកនាំ មន្ដ្រីកីឡា គ្រូបង្វឹក និងកីឡាករ-កីឡាការិនី និងមន្ដ្រីពាក់ព័ន្ធសរុប ១,២២៩នាក់ នៅពហុកីឡដ្ឋានជាតិមរតកតេជោ៕ អត្ថបទកែសម្រួលពី Cambodia SEA GAMES 2023

អត្ថបទ៖ នួន ស៊ីណា