Newcastle ឡើងប្រជែងពានជាមួយក្លឹបយក្សទាំង ៦ ក្រោយពីនាយករដ្ឋមន្ត្រីអារ៉ាបទិញក្លឹបបានមួយឆ្នាំ

2022-10-24 04:58:57
ព័ត៌មាន

2022-10-24 04:58:57
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីខែតុលា ឆ្នាំ២០២១ ក្លឹប Newcastle United ត្រូវបានលក់ទៅឱ្យសម្ព័ន្ធក្រុមហ៊ុនមួយដែលមានមូលនិធិវិនិយោគសាធារណៈ (PIF) នៃប្រទេសអារ៉ាប៊ីសាអ៊ូឌីតជាអ្នកដឹកមុខ។ មួយឆ្នាំក្រោយមក ក្លឹបនេះបានឡើងឈរលេខ ៤ នៃតារាង Premier League ក្រោយយកឈ្នះក្លឹប Tottenham Hotspur កាលពីថ្ងៃអាទិត្យកន្លងទៅ។

ព្រះអង្គម្ចាស់ Mohammed bin Salman

ក្លឹបនេះមាន ២១ពិន្ទុក្នុងដៃ ស្របពេលដែលក្រុមលេខ ១ Arsenal មាន ២៨ពិន្ទុ។ ប្រសិនបើក្លឹបសារិកាកែវនេះអាចឈរជើងបានត្រឹមលេខ ៤ ដល់ចប់រដូវកាល២០២២/២៣ ក្លឹបនេះនឹងបង្ហាញមុខនៅវេទិកា UEFA Champions League ជាលើកដំបូងក្នុងរយៈពេល ២០ឆ្នាំ។

ទម្រង់លេងដ៏គួរឱ្យចាប់អារម្មណ៍នេះ បានធ្វើឱ្យអ្នកអត្ថាធិប្បាយបាល់ទាត់អង់គ្លេសចាប់ផ្ដើមវាយតម្លៃថា នៅអង់គ្លេសអាចនឹងមាន «ក្លឹបកំពូលទាំង ៧» ដោយរាប់ក្លឹបកំពូលចាស់ចំនួន ៦ បូកនឹង Newcastle។

បម្រែបម្រួលមួយនេះអាចមកពីការចាក់លុយយ៉ាងសន្ធឹកពីរដ្ឋាភិបាលអារ៉ាប៊ីសាអ៊ូឌីត តាមរយៈមូលនិធិសាធារណៈរបស់ខ្លួន។ Newcastle នៅពេលនេះស្ថិតក្រោមការដឹកនាំរបស់លោកYasir Al-Rumayyan ទេសាភិបាលរបស់មូលនិធិ PIF តែសារព័ត៌មានមួយចំនួនចុះផ្សាយថា ការទិញយកក្លឹបមួយនេះអាចទទួលបានភ្លើងខៀវពីសំណាក់ព្រះអង្គម្ចាស់ Mohammed bin Salman រជ្ជទាយាទ និងជានាយករដ្ឋមន្ត្រីនៃប្រទេសអារ៉ាប៊ីសាអ៊ូឌីត។

មកទល់ពេលនេះ គេសង្កេតឃើញថា Newcastle ទើបតែផ្លាស់ប្ដូររចនាសម្ព័ន្ធក្បាលម៉ាស៊ីនដឹកនាំក្លឹប ដោយមិនទាន់មានការនាំចូលសមាសភាពកីឡាករថ្មីៗល្បីៗណាមួយឡើយ។ យ៉ាងណាមិញ គេនឹងទន្ទឹងរង់ចាំពីសកម្មភាពរបស់ក្លឹបនេះនៅក្នុងទីផ្សាររដូវរងាខាងមុខនេះ៕

ប្រភព៖ BBC ប្រែសម្រួល៖ ហ៊ីម រស្មី