លោក Thomas Tuchel អ្នកចាត់ការ​ក្លឹប​ Bayern Munich បាន​ប្រាប់​អ្នក​សារព័ត៌មាន​ថា លោក​គេង​មិន​លក់​ទេ ព្រោះ​លោក​ត្រូវ​ត្រៀម​កូន​ក្រុម​របស់​លោក​ប៉ះ​ជាមួយ​ក្លឹប Manchester City នា​រាត្រី​ថ្ងៃ​អង្គារ​នេះ ក្រោម​ក្របខ័ណ្ឌ​វគ្គ ៨ក្រុម​ចុង​ក្រោយ​នៃ​ព្រឹត្តិការណ៍ UEFA Champions League។

និយាយ​កាល​ពី​ពេល​ថ្មីៗ​នេះ​ លោក Tuchel បាន​ឱ្យ​ដឹង​ថា៖ «ខ្ញុំ​នឹង​ព្យាយាម​ចូល​ដេក​ឱ្យ​បាន​លឿន។ ខ្ញុំ​សង្ឃឹម​ថា ខ្ញុំ​នឹង​បាន​ដេក​លក់​ស្រួល។ ការ​ត្រៀម​ខ្លួន​ដ៏​ល្អ​បំផុត​គឺ ការ​សម្រាក ប៉ុន្តែ​ពេល​ខ្លះ ការ​ដេក​លក់​ស្កប់ស្កល់​ពិត​ជា​ពិបាក​រក​បាន​ណាស់ ពេល​ដែល​យើង​គិត​ពី​រឿង​ផ្សេងៗ»។

«នៅ​ព្រឹក​មិញ​នេះ ខ្ញុំ​ងើប​យ៉ាង​លឿន ហើយ​សម្រេច​ថា ទៅ​ទីលាន​ហ្វឹកហាត់​តែ​ម្ដង ដោយសារ​តែ​ខ្ញុំ​មិន​អាច​ត្រលប់​ទៅ​ដេក​វិញ។ ខ្ញុំ​គិត​តែ​ពី​ការ​ប្រកួត​រហូត»។ នេះ​ជា​ការ​បន្ថែម​របស់​លោក។

លោក Tuchel ទើប​តែ​តែងតាំង​ធ្វើ​ជា​គ្រូ Bayern នា​ពេល​ថ្មីៗ​នេះ​ទេ។ ក្នុង​ ១០ប្រកួត​ចុង​ក្រោយ ដែល​អតីត​គ្រូ​ Chelsea រូប​នេះ​លេង​ប៉ះ​ជាមួយ​លោក Pep Guardiola អ្នកចាត់ការ​ Man City ​ លោក​ Tuchelឈ្នះ​តែ​ ៣ដង​គត់៕