- 2015-08-11 15:22:15
- ប្រដាល់
តើគួរឲ្យ សែន រ៉ាឌី ជ្រើសរើសយក អាជីពប្រដាល់សេរី ឬ វ៉ូវីណាម?
- 2015-08-11 15:22:15
- ចំនួនមតិ 0 | ចំនួនចែករំលែក 0
តើគួរឲ្យ សែន រ៉ាឌី ជ្រើសរើសយក អាជីពប្រដាល់សេរី ឬ វ៉ូវីណាម?
ចន្លោះមិនឃើញ
ជើងខ្លាំងប្រដាល់សេរី សែន រ៉ាឌី កំពុងស្ថិតក្នុងការពិចារណាសម្រាប់ការជ្រើសរើសយកអាជីពពិតប្រាកដមួយរវាងប្រដាល់សេរី និងកីឡាវ៉ូវីណាម បន្ទាប់ពីលោកឈ្នះបានមេដាយមាសពិភពលោកនៅប្រទេសអាល់ហ្សេរីកាលពីពេលថ្មីៗនេះ ប៉ុន្តែប្រដាល់សេរីក៏បានធ្វើឲ្យមានកេរ្តិ៍ឈ្មោះល្បីដល់សព្វថ្ងៃដែរ។
កីឡាករ សែន រ៉ាឌី (ស្តាំ) និង ម៉ាត់ ឆ្វេង (ឆ្វេង) កាន់មេដាយមាស និងសំរឹទ្ធ
ម្ចាស់មេដាយមាសពិភពលោកកីឡាវ៉ូវីណាម សែន រ៉ាឌី បានឲ្យដឹងថា លោកមិនទាន់សម្រេចថានឹងបន្តអាជីពប្រដាល់សេរីទៀត ឬចាប់យកអាជីពជាកីឡាករវ៉ូវីណាមឡើយ ។ សម្រាប់ចំណង់ចំណូលចិត្តរបស់ រ៉ាឌី ផ្ទាល់គិតថា ចង់បន្តអាជីពទាំងពីរនេះក្នុងពេលជាមួយគ្នា ប៉ុន្តែប្រសិនបើកីឡាករណាម្នាក់ហ្វឹកហាត់កីឡាពីរប្រភេទក្នុងពេលតែមួយមិនមែនជារឿងងាយស្រួលឡើយ ។
កីឡាកររូបនេះបានបន្តថា កាលពីពេលថ្មីៗនេះ លោកគ្រូបង្ហាត់វ៉ូវីណាមរបស់លោកបានដាស់តឿនថា «ត្រូវតែគិតឲ្យបានច្បាស់ និងសម្រេចដោយខ្លួនឯងថា គួរចាប់យកអាជីពមួយណា ចង់បន្តវ៉ូវីណាម ឬចាប់យកប្រដាល់សេរី បើរើសខុសគឺខុស បើរើសត្រូវនឹងត្រូវ»។ ប៉ន្តែបើគិតមកត្រឹមពេលនេះ លោកមិនទាន់បានឆ្លើយតប់នឹងសំនួររបស់គ្រូឡើយ។
ម្ចាស់មេដាយ៦គ្រឿងពីប្រភេទកីឡាវ៉ូវីណាមរូបនេះបានលើកឡើងទៀតថា ប្រដាល់សេរីបានដក់ជាប់ក្នុងចិត្តរបស់គេជានិច្ច ហើយគេមានថ្ងៃនេះក៏ដោយសារកីឡាប្រដាល់សេរីដែរ ហេតុនេះទើបធ្វើឲ្យគេចង់ចាប់យកអាជីពទាំងពីរក្នុងពេលតែមួយ។ សែន រ៉ាឌីបានចាប់ផ្ដើមហាត់ប្រដាល់សេរីតាំងពីឆ្នាំ ២០០០ និងឆ្នាំ ២០១១ រូបគេបានចាប់ផ្ដើមហ្វឹកហាត់ កីឡាវ៉ូវីណាម។
ឆ្នាំ២០១១ សែន រ៉ាឌី បានចូលរួមប្រកួតក្នុងព្រឹត្តិការណ៍កីឡាស៊ីហ្គេមនៅឥណ្ឌូណេស៊ីលើប្រភេទកីឡាវ៉ូវីណាម និងទទួលបានមេដាយប្រាក់១គ្រឿង។ ឆ្នាំ២០១២ ការប្រកួតជើងឯកវ៉ូវីណាមនៅខេត្តសៀមរាប លោកឈ្នះមេដាយសំរឹទ្ធ១គ្រឿង។ ឆ្នាំ២០១៣ ព្រឹត្តិការណ៍កីឡាស៊ីហ្គេមនៅមីយ៉ាន់ម៉ា លោកឈ្នះបានមេដាយសំរឹទ្ធ១គ្រឿង។ ឆ្នាំ២០១៤ ការប្រកួតជើងឯកវ៉ូវីណាមពិភពលោកនៅប្រទេសមីយ៉ាន់ម៉ា លោកទទួលបានមេដាយប្រាក់១គ្រឿង និងពេលថ្មីៗនេះនៅប្រទេសអាល់ហ្សេរីក្នុងកម្មវិធីប្រកួតកីឡាវ៉ូវីណាមពិភពលោករូបគេទទួលបានមេដាយមាស។ សរុបស្ថិតិ ជើងខ្លាំងប្រដាល់សេរីរូបនេះចូលរួមប្រកួតកីឡាវ៉ូវីណាម៦លើកឈ្នះមេដាយទាំង៦គ្រឿងគឺមាស១ ប្រាក់២ និងសំរឹទ្ធ៣៕
អត្ថបទ៖ ស្រី សុវណ្ណដារ៉ា
