វ៉ន វីវ៉ា ឡើងប្រកួតមុនថ្ងៃមង្គលការរបស់ខ្លួន១១ថ្ងៃ

2014-11-07 08:57:57
ប្រដាល់

2014-11-07 08:57:57
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ល្បីឈ្មោះ វ៉ន វីវ៉ានឹងឡើងសង្វៀនប្រកួតនៅថ្ងៃទី៩ ខែវិច្ឆិកា ឆ្នាំ២០១៤នេះហើយក្នុងព្រឹត្តិការណ៍អាស៊ានវគ្គ៣របស់សង្វៀនស៊ីធីអិនស្តាតចាស់ពោលគឺត្រឹមតែ១១ថ្ងៃមុនពិធីមង្គលការរបស់ខ្លួនមកដល់។

កីឡាការិនីតេក្វាន់ដូជម្រើសជាតិកម្ពុជាកញ្ញា ស៊ន ដាវីន និងអ្នកប្រដាល់ វ៉ន វីវ៉ានឹងចូលរោងការនាថ្ងៃទី២០ ខែវិច្ឆិកា ឆ្នាំ២០១៤នេះហើយ បន្ទាប់ពីពួកគេបានភ្ជាប់ពាក្យកាលពីថ្ងៃទី១២ ខែតុលាកន្លងទៅ។

ម្ចាស់មេដាយប្រាក់ស៊ីហ្គេម២០១៣ ស៊ន ដាវីនធ្លាប់បានប្រាប់ Sabay កាលមុនភ្ជាប់ពាក្យថា ពួកគេជាប់ចូលរួមប្រកួតកីឡាស៊ីហ្គេមឆ្នាំ២០១៥នៅប្រទេសសិង្ហបុរី ដូច្នេះទំនងជាអាចរៀបការក្រោយកីឡាស៊ីហ្គេមឆ្នាំ២០១៥ ប៉ុន្តែមិនទាន់ដាច់ឆ្នាំ២០១៤ផងក៏ស្រាប់តែរៀបការតែម្តង។

អ្នកលេងកណ្តាប់ដៃ វ៉ន វីវ៉ា ត្រូវឡើងសង្វៀននៅថ្ងៃទី៩ ខែវិច្ឆិកានេះក្នុងព្រឹត្តិការណ៍អាស៊ានវគ្គ៣របស់ទូរទស្សន៍ស៊ីធីអិន។ រូបគេត្រូវប្រឈមនឹងជើងខ្លាំងមកពីប្រទេសឡាវ។ ដូច្នេះសម្រាប់ម្ចាស់ខ្សែក្រវាត់ពិភពលោកISKA រូបនេះឡើងប្រកួតមុនថ្ងៃមង្គលការរបស់ខ្លួន១១ថ្ងៃប៉ុណ្ណោះ។

ពិធីមង្គលការរបស់ វ៉ន វីវ៉ា និង ស៊ន ដាវីន នឹងប្រព្រឹត្តទៅនៅមជ្ឈមណ្ឌល ម៉ូឌែន៥ អគារ C វេលាម៉ោង៥ល្ងាច ហើយភ្ញៀវចូលរួមភាគច្រើនជាអ្នកកីឡាដូចគ្នា៕