- 2018-09-07 04:12:51
- បាល់ទាត់
គ្រូអេស្ប៉ាញថ្មី ចាត់ចែងក្រុមជម្រើសជាតិ តឹងតែងជាងមុន
- 2018-09-07 04:12:51
- ចំនួនមតិ 0 | ចំនួនចែករំលែក 0
គ្រូអេស្ប៉ាញថ្មី ចាត់ចែងក្រុមជម្រើសជាតិ តឹងតែងជាងមុន
ចន្លោះមិនឃើញ
គ្រូបង្វឹក Luis Enrique បានដាក់ចេញបទបញ្ជាតឹងតែងមួយចំនួនលើក្រុមកីឡាករជម្រើសជាតិអេស្ប៉ាញ មុនត្រៀមប្រកួតក្នុងកម្មវិធី UEFA Nations League។
លោក Enrique បានដាក់បម្រាមដូចជា ឈប់ឲ្យមានការទំនេរនៅពេលថ្ងៃរសៀល និងឈប់ឲ្យមានការលេងទូរស័ព្ទនៅអំឡុងពេលទទួលទានអាហារ។ ការដាក់បម្រាមទាំងនេះ ធ្វើឡើងក្រោយលោកធ្លាប់បាននិយាយកាលពីពេលកន្លងទៅថា លោកចង់ដឹកនាំក្រុមជម្រើសជាតិ ឲ្យមានលក្ខណៈដូចជាដឹកនាំក្លឹប។
ក្រៅពីការដាក់បម្រាមមួយចំនួន នៅពេលហ្វឹកហាត់វិញ លោក Enrique បានទាមទារក្រុមកីឡាករឲ្យខិតខំយកចិត្តទុកដាក់ខ្ពស់។ លោកចង់ឲ្យពួកគេ លេងរបៀប Tiki-taka ដោយគ្រប់គ្រងបាល់ឲ្យច្រើន ធ្វើឲ្យបាល់មានចលនាជានិច្ច ហើយធ្វើការសម្រុកនៅពេលដែលមានឱកាស។
ទោះជាតឹងតែងយ៉ាងនេះក្ដី កីឡាករអេស្ប៉ាញដូចជា Sergio Roberto និង Alvero Morata សុទ្ធតែសរសើរអំពីវិធីដឹកនាំរបស់ លោក Luis Enrique។
បន្ថែមពីការដាក់វិន័យ លើក្រុមកីឡាករ លោក Enrique ក៏មានភាពតឹងតែងលើក្រុមអ្នកសារព័ត៌មានផងដែរ។ លោកបានបញ្ជាមិនឲ្យការថត សកម្មភាពហ្វឹកហាត់របស់ក្រុមកីឡាករអេស្ប៉ាញឡើយ។
សូមបញ្ជាក់ផងដែរ ដោយមានភាពច្របូកច្របល់មួយចំនួនក្នុងតួនាទីគ្រូបង្វឹកនៅមុន World Cup ២០១៨ ក្រុមជម្រើសជាតិអេស្ប៉ាញហាក់ធ្វើមិនបានល្អឡើយក្នុងកម្មវិធីនោះ។ ក្រុមបានចាញ់ម្ចាស់ផ្ទះរុស្ស៊ីក្នុងវគ្គប៉េណាល់ទីនៅវគ្គ ១៦ ក្រុម។
កាលពីដើមខែកក្កដា សហព័ន្ធអេស្ប៉ាញបានធ្វើការតែងតាំងលោក Luis Enrique ជាគ្រូបង្វឹកក្រុមជម្រើសជាតិ។ លោកត្រៀមដឹកនាំប្រកួតដំបូងៗរបស់ខ្លួនក្នុងប្រកួត UEFA Nations League ប៉ះជាមួយអង់គ្លេស និងក្រូអាតនាពេលខាងមុខនេះ៕
