អតីតអ្នកលេង​បាល់ក្រៅ​ផ្លូវ​ការ​ជំនាញ​ជើងក្បាលដ៏ល្បីល្បាញអំឡុង​ឆ្នាំ​ ២០១០ ដល់​ ២០១៤ និង​បច្ចុប្បន្ន​ជាគ្រូ​បង្វឹក​ក្រុម​បាល់ទះ​ពង្រូល​កំពង់ស្ពឺលោក សៅ សាមីត ​បាន​បង្ហាញ​អោយ​អ្នកគាំទ្រ​បាល់ទះ​ភ្ញាក់ផ្អើល​ក្នុងការដឹកនាំក្រុម​ខ្លួន​​ឈ្នះពីរ​ប្រកួតជាប់ៗ​គ្នា គឺ​ឈ្នះលើក្រុមគោព្រៃកណ្ដាលម៉ាប់ឆ្វេង ពីរ​សិតទល់នឹង​មួយ​សិត និងឈ្នះក្រុមនាគព្រៃវែងឌូកក្ដូពីរ​សិតទល់មួយ​សិត ជា​ក្រុម​មានភាគរយខ្ពស់ឡើងទៅចាំវគ្គផ្ដាច់ព្រ័ត្រ។

នៅសល់តែមួយប្រកួតទៀតប៉ុណ្ណោះ បើក្រុមពង្រូលកំពង់ស្ពឺឈ្នះក្រុមដំរីសៀមរាបបន្ទាយឈើ ពួកគេនឹងឡើងទៅចាំវគ្គផ្ដាច់ព្រ័ត្រតែម្ដង។ ចំណុចនេះហើយទើបលោក សៅ សាមីត មានសង្ឃឹមឡើង​វគ្គផ្ដាច់ព្រ័ត្រនិង​សង្ឃឹម​ហូតដល់ ៧០% ក្នុងការលើកពានបាល់ទះ​ Slamball ដែល​សហការរៀបចំដោយក្រុមហ៊ុនស្រាបៀ Anchor ក្រុមហ៊ុន Sabay Digital និងសហព័ន្ធ​កីឡាបាល់ទះ​កម្ពុជា​។

នៅថ្ងៃសៅរ៍ទី៨ ខែមករា ឆ្នាំ២០២៣ ខាងមុខ ក្រុមលោកគ្រូ សៅ សាមីត ឬប្រិយមិត្តស្គាល់ថាឆាស្មីតកំពូល​កុក​នឹងប៉ះជាមួយក្រុមដំរីសៀមរាបដែល​លោកយល់ថា មិនពិបាកយកឈ្នះ​លើ​ក្រុមរបស់លោកគ្រូ ឡេង ប្រុស ឡើយ​។ រំពឹងខ្ពស់បែបនេះព្រោះលោកសំអាងលើកត្តាធំៗបីគឺទី១ សមត្ថភាពស្មាត់ក្រុមពង្រូល​កំពង់ស្ពឺបាន ១០ ខាងដំរី​សៀមរាបបាន ៧ ទី២​រនាំងកំពង់ស្ពឺបាន ១០ ខាងដំរី​សៀមរាបបាន ៧ និង​ទី៣ការការពារឬ​ជើងក្រោមកំពង់ស្ពឺ ១០ ខណៈ​ដំរី​សៀមរាបបាន ៧ ​ប៉ុណ្ណោះ។

ចំណែក​សមាសភាពរបស់ក្រុមពង្រូលកំពង់ស្ពឺមាន​កីឡា​ករ​ល្បីៗ​ដូចជា​ទូចអង្គរក្ស យុនស្រែស្រែ រាជ វិចិត្រប៉ះសេ និងកែវសុធារិទ្ធ រីឯក្រុមដំរីសៀមរាបមានក្បាល​ដែក​បន្ទាយឈើ រស់ហាន់វ៉ា ឡាំយ៉ៃបី​កាំបិត​ ង៉ូវ ប៉ញ្ញា និងត្រី​ឆ្លាំងប៉ះសេ។

បើក្រុមពង្រូលកំពង់ស្ពឺឈ្នះក្រុមដំរីសៀមរាប ឬក្រុមដំរីសៀមរាបឈ្នះក្រុមពង្រូល​កំពង់ស្ពឺ នៅថ្ងៃ​សៅរ៍ទី៨ ខែមករា ឆ្នាំ២០២៣ ពួកគេនឹងឡើងទៅចាំវគ្គផ្ដាច់ព្រ័ត្រដូចគ្នា​ដែល​នឹង​ធ្វើ​ឡើង​នៅថ្ងៃទី២៨ ខែមករា ឆ្នាំ២០២៣។

គួរបញ្ជាក់ថា ជ័យលាភីលេខ១ទទួលបានពានមួយ មេដាយមាសមួយ និងប្រាក់រង្វាន់ ៥,០០០ដុល្លារ ជើងឯករងបានប្រាក់រង្វាន់ ៣,០០០​ដុល្លារ និងលេខ៣បានប្រាក់រង្វាន់ ១,៥០០​ដុល្លាររួមជាមួយ​រង្វាន់​ផ្សេងៗ​ជា​ច្រើន​ទៀត​៕