កីឡាបាល់ទាត់នៅស៊ីហ្គេម ផ្នែកបុរសមាន១០ក្រុម និងនារី៩ក្រុមចូលរួម

2023-04-02 22:02:20
បាល់ទាត់

2023-04-02 22:02:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាដំណឹងផ្លូវការតែម្ដង សម្រាប់ការប្រកួតកីឡាបាល់ទាត់ក្នុងព្រឹត្តិការណ៍ស៊ីហ្គេម២០២៣ខាងមុខនេះ នឹងមានក្រុមផ្នែកបុរស១០ក្រុម និងនារី៩ក្រុម ដែលការចាប់ឆ្នោតនឹងធ្វើឡើងនៅពហុកីឡដ្ឋានមរតកតេជោ នាថ្ងៃទី៥ខែមេសាឆ្នាំ២០២៣នេះហើយ។

សម្រាប់ប្រទេស ដែលបានចូលរួមលើប្រភេទកីឡាបាល់ទាត់បុរសអាយុក្រោម២២ឆ្នាំ ក្នុងព្រឹត្តិការណ៍ស៊ីហ្គេម ឆ្នាំ២០២៣នេះ គឺមាន ១០ប្រទេស រួមមានម្ចាស់ផ្ទះកម្ពុជា, ឥណ្ឌូនេស៊ី, ឡាវ, ម៉ាឡេស៊ី, មីយ៉ាន់ម៉ា, ហ្វីលីពីន, សិង្ហបុរី, ថៃ, វៀតណាម និងទីម័រខាងកើត ខណៈប្រទេសប្រ៊ុយណេ ពុំមិនបានចូលរួមលើប្រភេទកីឡានេះទេ។

ដោយឡែក ចំពោះកីឡាបាល់ទាត់នារីវិញ មាន ៩ប្រទេសចូលរួម ក្នុងនោះមានម្ចាស់ផ្ទះកម្ពុជា, ឥណ្ឌូនេស៊ី, ឡាវ, ម៉ាឡេស៊ី, មីយ៉ាន់ម៉ា, ហ្វីលីពីន, សិង្ហបុរី, ថៃ និង វៀតណាម ចំណែកប្រ៊ុយណេ និងទីម័រខាងកើត មិនបានបញ្ជូនក្រុមបាល់ទាត់នារីរបស់ខ្លួន មកចូលរួមការប្រកួតក្នុងព្រឹត្តិការណ៍ជាប្រវត្តិសាស្រ្ត លើកដំបូង នៅកម្ពុជានេះទេ។

ចំពោះរូបមន្តនៃការចាប់ពូល ក៏ដូចជាការបែងចែកប្រអប់ នឹងត្រូវបញ្ជាក់ជូននៅថ្ងៃចាប់ពូលផ្ទាល់តែម្ដង។ លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា បានថ្លែងថា៖ «នេះជាការចាប់ពូលមួយ ដែលយើងធ្វើទៅតាមលំនាំនៃការរៀបចំលក្ខណៈអន្តរជាតិ។ យើងមានទីប្រឹក្សា គឺខាងសហព័ន្ធកីឡាបាល់ទាត់ទ្វីបអាស៊ី អ៊ីចឹងគំនិតផ្ដួចផ្ដើមពីការរៀបចំចាប់ពូល យើងធ្វើតាមលំនាំបច្ចេកទេស ដូចដែលយើងធ្លាប់បានធ្វើកន្លងមក គឺមានជាការបែងចែកប្រអប់ (Pot) រួចកំណត់តាមសមិទ្ធផល នៃចំណាត់ថ្នាក់របស់ក្រុមនីមួយៗ នៅស៊ីហ្គេមចុងក្រោយ»។

អត្ថបទ៖ ប្រុស យុទ្ធ