កុមារកម្ពុជា ៤រូប៖ ពិតជាមានសំណាងនឹងកាន់ដៃកីឡាករ Tottenham Hotspur នៅ Premier League ឆាប់ៗនេះ

2023-05-18 22:56:55
បាល់ទាត់

2023-05-18 22:56:55
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករ កីឡាការិនីថ្នាលរបស់អង្គការផ្កាយសមុទ្រ ៤រូប ធ្វើដំណើរទៅប្រទេសអង់គ្លេសដើម្បីចូលរួមធ្វើជាអ្នកកាន់ដៃកីឡាកររបស់ក្រុមបាល់ទាត់ Tottenham Hotspur នៃការប្រកួតពានរង្វាន់បាល់ទាត់ Premier League។

រូបភាពផ្ដល់ជូន

នេះបើតាមការបញ្ជាក់របស់អង្គការផ្កាយសមុទ្រ គឺកីឡាករ កីឡាការិនីថ្នាល៤រូបដែលបានជ្រើសរើសទៅប្រទេសអង់គ្លេសដើម្បីដឹកដៃកីឡាករ Tottenham Hotspur នឹងធ្វើឡើងនៅថ្ងៃទី២០ ខែឧសភា ឆ្នាំ២០២៣ នៅជំនួបជាមួយក្រុម Brentford។ ចំពោះការចំណាយលើក្នុងការធ្វើដំណើររបស់កីឡាករ កីឡាការិនី ថ្នាលទាំង៤រូបនេះគឺត្រូវបានឧបត្ថម្ភទាំងស្រុងដោយ AIA Group រួមមានថ្លៃសំបុត្រយន្តហោះ ទិដ្ឋាការ មធ្យោបាយធ្វើដំណើរ ការស្នាក់នៅ និងដំណើរកម្សាន្តទៅកាន់ទីកន្លែងជាច្រើនក្នុងទីក្រុងឡុងដ៍ជាដើម។ ដោយឡែកការធ្វើដំណើរនេះក៏ទទួលបានការគាំទ្រ និងសម្របសម្រួលដោយក្រុមហ៊ុនធានារ៉ាប់រងអាយុជីវិត និងសុខភាព AIA Cambodia ផងដែរ។

ក្រុមបាល់ទាត់ Hotspur

នេះគឺជាការធ្វើដំណើរទៅក្រៅប្រទេសលើកដំបូងបង្អស់ក្នុងជីវិតរបស់កីឡាករ កីឡាការិនីថ្នាល ៤រូបនេះ ដែលសុទ្ធសឹងតែមានជីវភាពក្រីក្របំផុត។ ពេលនេះពួកគេមានឱកាសកាន់លិខិតឆ្លងដែនដែលមានភ្ជាប់ទិដ្ឋាការ និងអង្គុយលើកៅអីយន្តហោះជាលើកដំបូងក្នុងឆាកជីវិត។ កុមារកម្ពុជាក្រីក្រទាំងនេះទទួលបានការរៀនសូត្រឡើងវិញ និងបានបន្តទៅរៀននៅសាលារដ្ឋដោយមានការឧបត្ថម្ភគាំទ្ររបស់អង្គការផ្កាយសមុទ្រ ដោយពួកគេធ្លាប់បានបោះបង់ការសិក្សាអស់រយៈពេលជាច្រើនឆ្នាំដើម្បីជួយរកប្រាក់ចំណូលចិញ្ចឹមគ្រួសារ។

រូបភាពផ្ដល់ជូន

ពីក្មេងដែលធ្លាប់តែទាត់បាល់លើដីវាលមិនមានស្មៅក្នុងសហគមន៍ដែលគេរស់នៅហើយបានក្លាយជាកុមារ ដែលមានវាសនាអាចកាន់ដៃកីឡាករពិភពលោកល្បីៗដើរនៅលើទីលានស្មៅខៀវខ្ចីរបស់ Premier League គឺជាក្តីស្រមៃ ដែលកុមារកម្ពុជាក្រីក្រទាំង៤រូបនេះពុំធ្លាប់បានគិតពីមុនមកនោះឡើយ៕

អត្ថបទ៖ នួន ស៊ីណា