- 2017-10-19 20:00:19
- បាល់ទាត់
អតីតមន្ត្រីផ្នែកកីឡាព្រៃវែងចេញលុយផ្ទាល់ខ្លួនយកក្រុមសីដក់មកប្រកួតនៅភ្នំពេញ
- 2017-10-19 20:00:19
- ចំនួនមតិ 0 | ចំនួនចែករំលែក 0
អតីតមន្ត្រីផ្នែកកីឡាព្រៃវែងចេញលុយផ្ទាល់ខ្លួនយកក្រុមសីដក់មកប្រកួតនៅភ្នំពេញ
ចន្លោះមិនឃើញ
អតីតប្រធានការិយាល័យអប់រំ កាយ និងកីឡានៃមន្ទីរអប់រំ កាយ និងកីឡាខេត្តព្រៃវែងបានចំណាយប្រាក់ផ្ទាល់ខ្លួនដើម្បីដឹកនាំក្រុមកីឡាសីដក់ដែលលោកបានបង្កើតមកចូលរួមប្រកួតកីឡាសីដក់ឆ្នាំ២០១៧ដែលនឹងចាប់ផ្តើមពីថ្ងៃទី២០ ដល់២៥ ខែតុលា។
លោក គង់ សយ អតីតប្រធានការិយាល័យ អប់រំ កាយ និងកីឡាខេត្តព្រៃវែងដែលទើបចូលនិវត្តន៍បានឲ្យដឹងថា ៖«អ្វីៗទាំងអស់ដែលខិតខំប្រឹងប្រែងបង្កើតហើយនោះមិនត្រូវឲ្យរលាយទៅវិញបានដោយងាយនោះទេ ទោះបីចូលខ្ញុំនិវត្តន៍ហើយក៏ដោយ។ ខ្ញុំសុខចិត្តចំណាយថវិកាផ្ទាល់ខ្លួនបង្កើតជាក្រុម ដឹកនាំក្រុមសីដក់ទៅចូលរួមប្រកួតពានរង្វាន់សីដក់លើកទី១ឆ្នាំ២០១៧នៅរាជធានីភ្នំពេញ ព្រោះកីឡាសីដក់នេះក្នុងរយៈពេលបីឆ្នាំជាប់គ្នា ដណ្តើមបានពានចំនួន៤ មេដាយមាស ប្រាក់ និងសំរឹទ្ធជាច្រើន ជូនមន្ទីរ អប់រំ យុវជន និងកីឡាខេត្ត មិនត្រូវបំភ្លេចចោលនោះទេ»។
លោកបន្ថែមទៀតថា បើទោះបីជាខ្វះខាតយ៉ាងណាក៏ដោយ ក៏លោកសុខចិត្តចំណាយលើឯកសណ្ឋានក្រុម ស្បែកជើង ការស្នាក់នៅ និងការធ្វើដំណើររបស់ក្រុម។
ជុំវិញបញ្ហានេះដែរ លោក ទេស វិសាល ប្រធានស្តីទីការិយាល័យអប់រំកាយ និងកីឡា នៃមន្ទីរអប់រំ កាយ និងកីឡាខេត្តបានប្រាប់ថា តាមពិតទៅខាងការិយាល័យអប់រំកាយ និងកីឡាខេត្តពិតជាចង់ជួយ និងជ្រោមជ្រែងចូលរួមការប្រកួតខ្លាំងណាស់។ ប៉ុន្តែក្រុមសីដក់ដែលត្រូវចូលរួមប្រកួតកីឡាសីដក់លើកទី១ឆ្នាំ២០១៧នេះមិនស្ថិតនៅក្នុងគម្រោងចំណាយរបស់ការិយាល័យ។ ម្យ៉ាងវិញទៀត ការិយាល័យកំពុងគ្រោងបញ្ជូនក្រុមបាល់ទាត់យុវជនអាយុក្រោម១៤ឆ្នាំ និងក្រុមអាយុក្រោម១៦ឆ្នាំដើម្បីចូលរួមប្រកួតលីគបាល់ទាត់យុវជនកម្ពុជាដែលគ្រោងធ្វើនាពេលខាងមុខនេះ។ ដូច្នេះការិយាល័យអប់រំកាយ និងកីឡាខេត្តមិនមានថវិកាសម្រាប់លើការចំណាយផ្សេងទៀតទេ។
ទោះបីជាយ៉ាងណា បើតាមសេចក្តីជូនដំណឹងរបស់សហព័ន្ធកីឡាសីដក់ និងឈិនឡូនកម្ពុជាបានបញ្ជាក់ថា ចំពោះក្លឹបនៅតាមខេត្ត សហព័ន្ធនឹងផ្ដល់ជាអាហារកញ្ចប់ និងឧបត្ថម្ភខេត្តដែរ។
លោក គង់ សយ អតីតប្រធានការិយាល័យ អប់រំ កាយ និងកីឡាខេត្តព្រៃវែងត្រូវដឹកនាំក្រុមកីឡាសីដក់ផ្នែកបុរសសម្រាប់លេងវិញ្ញាសាបុរស៣នាក់ទល់នឹង៣នាក់ចូលរួមប្រកួតកីឡាសីដក់លើកទី១ឆ្នាំ២០១៧នេះដែលចាប់ផ្តើមប្រកួតថ្ងៃទី២០ ខែតុលានេះហើយ៕
