បឹងកេត អស់ឱកាសទៅវគ្គបន្ត ក្រោយចាញ់ Sanna ធ្ងន់ក្នុងដីរបស់ខ្លួន

2017-12-13 06:56:13
បាល់ទាត់

2017-12-13 06:56:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់ផ្ទះបឹងកេតរបស់កម្ពុជាបានបាត់បង់ឱកាសឡើងវគ្គបន្តហើយ បន្ទាប់ពីចាញ់ក្រុមរបស់វៀតណាម Sanna Khánh Hòa BVN FC ដោយលទ្ធផល ៥-១ ក្នុងជើងទី២ដែលគិតទាំងពីរជើងចាញ់ ៩-៥ ក្នុងព្រឹត្តិការណ៍ពានរង្វាន់ Toyota Mekong Club Championship។

ក្រុមបឹងកេត

ការប្រកួតជើងទីពីរនេះ ម្ចាស់ផ្ទះបឹងកេតធ្វើមិនបានល្អទេ ដោយបើកការប្រកួតវគ្គទី១ ក្រុម Sanna អាចស៊ុតបាន២គ្រាប់ត្រឹម១៦នាទីដំបូង ប៉ុន្តែនៅនាទីទី២០ ខ្សែការពារ សុខ សុវណ្ណ បានបំបែកពង់មាន់របស់ភ្ញៀវដើម្បីតាមក្រោយ ២-១ រហូតដល់ចប់៤៥នាទីដំបូង។ ជាមួយគ្នានេះ អ្នកចាំទី ស៊ូ យ៉ាទី ត្រូវបានដូរចេញជំនួសវិញដោយអ្នកចាំទី គឹម មករា ដែលកាន់តែធ្វើឲ្យម្ចាស់ផ្ទះព្រួយបារម្ភ។

ក្រុម Sanna

ការប្រកួតវគ្គទី២ បឹងកេតបានព្យាយាមវាយសម្រុក ប៉ុន្តែនៅតែធ្វើមិនបានល្អ។ នៅនាទី៥៤ ខ្សែប្រយុទ្ធប្រេស៊ីល Maycon ស៊ុតបាល់ពិន័យ១១ម៉ែត្រមិនចូលដោយអ្នកចាំទីរបស់ភ្ញៀវជួយសង្គ្រោះបាន ហើយបន្ទាប់មកខ្សែការពារ ស៊ុន សុវណ្ណរិទ្ធី ត្រូវបានអាជ្ញាកណ្តាលពិន័យកាតក្រហមបណ្តេញចេញពីលានថែមទៀត ក្រោយទទួលបានកាតលឿងលើកទី២តាមរយៈដៃប៉ះបាល់។ បន្ទាប់ពីសល់សមាជិកតែ១០នាក់ បឹងកេតកាន់តែមានទម្រង់លេងការពារមិនល្អរហូតធ្វើឲ្យភ្ញៀវស៊ុតចូល៣គ្រាប់ទៀតនៅនាទីទី៧២ ៧៨ និង៨៩។ ចប់ការប្រកួតបឹងកេតចាញ់ ៥-១ (ទាំងពីរជើង ៩-៥) ដោយអស់ឱកាសឡើងវគ្គបន្តហើយ ខណៈក្រុមវៀតណាម Sanna Khanh ឡើងវគ្គពាក់កណ្តាលផ្តាច់ព្រ័ត្រជួបក្រុមជើងឯកឡាវ៕